:: Gaeilge ::

Ag Déanamh Iarratais chuig Bord Fiontar i leith Deontais

D’fhéadfadh fiontair bheaga nua agus cinn reatha sna rannóga incháilithe déantúsaíochta agus seirbhísí trádála idirnáisiúnta tairbhe a bhaint as deontas staidéir caipitil, fostaíochta nó féidearthachta óna mBord Fiontar Cathrach/Contae. Bheadh fiontair le níos lú ná deichniúr fostaithe lánaimseartha incháilithe agus níl aon srian ar an leibhéal infheistíochta. D’fhéadfadh fáil a bheith ar dheontais caipitil do cheannach innealra nua agus fearas, d'ionad oibre nua a thógáil nó síneadh a chur leis an gceann atá ann cheana nó deontais fostaíochta a bheith ar fáil i leith féinfhostaíocht nó earcaíocht foirne breise lánaimseartha. Tá deontais staidéir féidearthachta le fáil nuair a theastaíonn ón tionscnóir inmharthanacht an ghnó nua a mheas, suirbhé margaíochta a dhéanamh, dul i mbun forbartha táirge nó fréamhshamhla nó go deimhin comhairliúchán seachtrach a cheannach le cabhrú i measúnú an táirge nua nó éagsúlú fiontair.

Tá riachtanais áitiúla aitheanta ag chuile Bhord agus tosaíocht tugtha acu dá ngníomhréimse, ag aithint rannóga a bhfuil sé i gceist forbairt a dhéanamh orthu idir anois agus deireadh 2006. Is gné ar leith é seo de na Boird Cathrach agus Contae, go bhfuil solúbthacht acu, laistigh de theorainneacha polasaí náisiúnta, tacú le tionscnaimh áitiúla atá de réir Plean Gníomhaíochta Bhord Fiontar Chontae Thiobraid Árann Thuaidh. Ní raibh sé chomh furasta ariamh iarratas a déanamh ar chabhair deontais mar tá eolas mionsonraithe ag formhór na mBord faoi na raon tacaíochtaí atá ar fáil uathu ar a suímh idirlín acu chomh maith leis an áis iarratas ar líne. Socraítear cuairt suímh leis an tionscnóir nuair a fhaightear iarratas deontais leis an togra gnó a phlé go mion. Go deimhin is iondúil go mbíonn deis ag an iarrthóir siúl isteach in Ionad Eolais Gnó ina bhfuil Oifigeach Forbartha Gnó atá lánsásta treoir a thabhairt le foirmeacha iarratais a líonadh, clárú do cháin, an t-ainm gnó a chlárú, an cuideachta a chorprú chomh maith le heolas a thabhairt faoi thacaíochtaí airgeadais agus neamhairgeadais atá ar fáil ón mBord agus ó eagraíochtaí/gníomhaireachtaí eile.

Aithnítear riachtanais an iarrthóra de ghnáth ag an tús agus ofráiltear roghanna ó chairt tacaíochta nó bearta oiliúna i leith bainistíochta nó easpaí eile ar nós pleanáil airgid, costáil, margaíocht, dearadh, maoin intleachtúil, ríomhthráchtáil agus rle. Tá ceardlanna oiliúna grúpa, comhairliúchán aon lena haon nó meascán den phéire ar fáil le dul i ngleic le riachtanais oiliúna/eolais an fhiontraí.

Tá foirm iarratais shimplí ag na Boird leis an eolas riachtanach a bhailiú le cáilitheacht an tionscnaimh a mheas. Tá eolas sa bhfoirm faoin doiciméadú a theastaíonn i dtaca leis an togra ar nós curriculum vitae, luachana, orduithe ar aghaidh, cuntais staire (i gcás gnólachtaí reatha), cuntais fortheilgthe (2 bhliain – gach iarrthóir), deimhniú ar chorprú (cuideachta amháin), grianghrafanna/samplaí táirge, sceideal infheistíochta (liosta fearais, costais tógála foirgníochta/mionathraithe, caipiteal oibre rle). I gcás Staidéar Féidearthachta, teastóidh meastachán ar tháille an chomhairleora/na gcomhairleoirí roghnaithe a thabharfas léargas ar réimse an taighde/na hoibre a bhéas le déanamh agus ar na costais a bhaineas leis. Tá mionsonraí an réamhthaighde/taighde deisce a déanadh roimh dáta an iarratais riachtanach freisin.

Tugann Coiste Meastóireachta neamhspleách breithiúnas ar na hiarratais uilig agus comhairlíonn siad an Bord ó thaobh inmharthanacht tráchtála, an bhfuil an t-ábharthacht/comhsheasmhacht áitiúil de réir Plean Gníomhaíochta an Bhoird, polasaí náisiúnta agus nithe eile. Déanfar marbhualach agus asáitiú a phlé ag an tráth seo freisin. Cuirfear moladh an Choiste Meastóireachta ar aghaidh ansin chuig an mBord le meas agus má ghlacann siadsan leis seoltar litir tairisceana/aontú deontais chuig an iarrthóir láithreach tar éis chruinnithe an Bhoird chomh maith le pacáiste éilimh ar dheontas iomlán. Tá mí ag gach deontaí le glacadh leis an tairiscint cabhrach agus suas le 6 mhí de ghnáth leis an togra gnó a chur i bhfeidhm. Tréimhse naoi mí atá ann do thairbhithe deontais fostaíochta. Tá cabhair ar fáil do dheontaithe chun na deontais ceadaithe a tharraingt anuas, chun foirmeacha a líonadh, iarratas a dhéanamh ar dheimhniú glanta cánach, nó aimsiú árachais rle. Nuair a dhiúltaítear cabhair airgid tá sé de pholasaí ag an mBord gach iarracht a dhéanamh freastal ar riachtanais an iarrthóra ó thaobh comhairle, eolas agus oiliúint, beag beann ar rannóg. I gcásanna áirithe, cuireann an Bord tionscnaimh ar aghaidh chuig gníomhaireachtaí eile a d’fhéadfadh tacaíocht airgid a thabhairt. Má tá tú ag smaoineamh do ghnó beag féin a thosaí nó a leathnú ba chóir duit dul i dteagmháil leis an mBord Fiontar Cathrach nó Contae áitiúil.

Cúnamh Airgid
Deontais Caipitil agus Fostaíochta
Miosúr 1 – Cúnamh Airgeadais Roghnach

Réamhrá
Faoin Miosúr seo, tá scéim ag an mBord dírithe ar chabhair a thabhairt trí dheontais caighdeánacha agus cabhair inaisíoctha – caipitil nó fostaíochta – do bhunú tionscnaimh eacnamaíochta ar scála beag agus é mar phríomhaidhm acu postanna buana a chruthú agus a chothabháil chomh maith leis an infreastruchtúir eacnamaíochta a fhorbairt ag an leibhéal áitiúil. Beidh sé mar aidhm ag an mBord freisin:

• Fostaíocht agus féidearthacht bhreisluacha na mionfhiontar a uasmhéadú,

• Cuidiú le hiomaíocht náisiúnta,

• Nach mbeifí ag brath chomh mór ar rannóga eacnamaíochta traidisiúnta nó cinn atá ag dul i laige,

• Tacú le páirtíocht níos mó ón dream dífhostaithe agus ó mhná i gcothú agus i bhforbairt fiontar,

• Deiseanna fostaíochta a chur ar fáil i gceantair nach bhfuil chomh forbartha sin agus i gceantair scoite le forbairt réigiúnda cothromaithe bhreisluacha agus buanseasmhacht a bhaint amach.

Cineálacha Cabhrach Airgeadais
Faoi Mhiosúr 1 (Cúnamh Airgeadais Roghnach) den Mhiosúr Mionfhiontair den Chlár Oibríochtúil Réigiúnda 2000-2006 tá an Bord ábalta na cineálacha cabhrach airgid seo a thairiscint:

• Deontais Caipitil

• Deontais Féidearthachta

• Deontais Fostaíochta

Tá coinníollacha agus teorainneacha ar leith ag baint le heisiúint na nDeontas Caipitil, Féidearthachta agus Fostaíochta mar atá leagtha síos sa Chlár Comhlánaithe athmheasta do réigiúin An Teorainn, Lár Tíre agus an Réigiún Thiar (BMW) agus réigiúin Theas agus Thoir (S&E) an Bhoird ón 1 Iúil 2004. Is iad na teorainneacha ná:

• Deontais Caipitil

• I réigiún An Teorainn, Lár Tíre agus an Réigiún Thiar, tá Deontas Caipitil suas go dtí 50% de shócmhainní seasta incháilithe nó €75,000. Caithfidh aon phíosa den deontas os cionn 40% de na sócmhainní seasta incháilithe a bheith i bhfoirm inaisíoctha.

• Sa réigiún Theas agus Thoir (a áiríonn Tiobraid Árann Thuaidh), tá Deontas Caipitil suas go dtí 50% de shócmhainní seasta incháilithe nó €75,000. Caithfidh aon phíosa den deontas os cionn 35% de na sócmhainní seasta incháilithe a bheith i bhfoirm inaisíoctha.

Tá socrú déanta nach mbeidh an srian €127,000 atá ann ar infheistíochtaí (gan ceadú Roinne) i bhfeidhm ón 1 Eanáir 2004. Ach, caithfidh na Boird a bheith aireach le costais mharbhualaigh a sheachaint nuair atá siad ag cuimhniú tacú le tionscnaimh mhóra.

• Deontais Fostaíochta

• D’fhéadfadh €7,500 a bheith le fáil i ndeontais fostaíochta do gach post (suas go dtí 10 bpost) ag tionscnaimh incháilithe i réigiún An Teorainn, Lár Tíre agus an Réigiún Thiar agus an Réigiún Theas &Thoir.
• Is féidir deontais fostaíochta a eisiúint ar bhonn neamhinaisíoctha nó inaisíoctha (go hiomlán nó ina sciar).

Roghnú Tionscnaimh
Tá breithmheas córasach ag Bord Fiontar Chontae Thiobraid Árann Thuaidh ar gach togra tionscnaimh. Déanann an Coiste Meastóireachta an chéad iarratas a mheas agus cuireann siad moladh chuig an mBord faoin leibhéal agus cineál cabhrach a theastaíonn bunaithe ar roinnt gnéithe ar a n-áirítear na príomhchritéir roghnach seo a leanas:

• Caighdeán an phlean tionscnaimh agus an t-ábharthacht áitiúil agus na buntáistí eacnamaíochta atá aige

• Inmharthanacht thráchtála an fhiontair agus an phlean tionscnaimh

• Infhaighteacht airgid comhoiriúnach/staid maoinithe reatha an fhiontair agus na foinsí maoinithe atá beartaithe

• Costéifeacht an togra

• Cabhair an phlean do fhorbairt an fhiontair ó thaobh acmhainn inmheánaigh

• Féidearthacht mharbhualaigh agus asáitithe

• An tionchar ar bhochtaineacht, cothromaíocht, forbairt tuaithe agus an comhshaol.

Tá na critéir bhreise seo a leanas do roghnú tionscnaimh agus leibhéil dhreasachta leagtha síos ag an Roinn Fiontar, Trádála agus Fostaíochta agus dearbhaithe sa Chlár Oibríochtúil Réigiúnda don Deisceart agus an Oirthear agus sa Phlean Forbartha Náisiúnta 2000-2006 a deireann go gcaithfidh:

1. Tús áite a bheith ag seirbhísí trádála déantúsaíochta agus seirbhísí idirnáisiúnta a bheadh ina n-aonáin easpórtála láidre le himeacht aimsire agus a shroicheadh punann Fiontraíocht Éireann.
2. Tionscnaimh turasóireachta a bheadh dírithe ar chuairteoirí ón iasacht go príomha.
3. Tionscnaimh seirbhísí áitiúla a chothaíonn daoine dífhostaithe nó daoine a chaill a bpostanna le deireanas maraon le mná atá ag dul ar ais ag obair - ní mór do thionscnaimh mar iad marbhualach agus asáitiú a sheachaint agus gan dul thar 25% d’acmhainn ceadaithe bliantúil an Bhoird.

Leibhéil Dhreasachta atá i bhFeidhm ón 1 Iúil 2004

1. Deontas Caipitil suas go dtí 50% de shócmhainní seasta incháilithe nó €75,000. Caithfidh aon phíosa den deontas os cionn 35% de na sócmhainní seasta incháilithe a bheith i bhfoirm inaisíoctha.
2. Deontais Fostaíochta ar uasmhéid €7,500 do gach fostaí de dheichniúr fostaí sna cásanna amháin gur féidir a thaispeáint go soiléir nach bhfuil aon ghanntanas oibre ann. Ní féidir níos mó ná 25% d’acmhainn ceadaithe bliantúil an Bhoird a bheith ina ndeontais fostaíochta.
3. 50% den chostas a bhainfeadh le staidéar féidearthachta nó réiteach plean gnó suas go dtí uasmhéid de theorainn €5,100 an tionscnamh.
4. Caithfidh aon sciar den chabhair Deontais os cionn 35% a bheith i bhfoirm inaisíoctha.

Cabhair Inaisíoctha
Ó tugadh isteach an chabhair inaisíoctha ar an 1 Eanáir 2000, tá ar an mBord a theacht suas le pacáiste dhreasachta comhcheangailte, ar a n-áirítear deontais caipitil agus cabhair inaisíoctha atá de réir critéir nua na Roinne mar atá sonraithe thuas. Tá na treoirlínte seo a leanas glactha ag Bord Fiontar Thiobraid Árann Thuaidh maidir le tairiscint cabhrach inaisíoctha.

1. Ní bhainfidh Cabhair Inaisíoctha ar dtús ach le deontais caipitil a bheidh mar infheistíocht i bhforbairt suímh agus obair thógála agus ceannach innealra agus fearas.
2. 36 mí an tréimhse socraithe aisíocaíochta is faide a bheidh ann
3. I gcásanna eisceachtúla, d’fhéadfaí uasmhéid de thréimhse 60 mí a thabhairt in ionad an 36 mí do thionscnaimh pobail.
4. Ní bheidh aon ráta úis (0%) ar aon tionscnamh ar dtús agus déanfar athbhreithniú bliantúil ar na teorainneacha seo ach ní bheidh sé os cionn 6%.
5. Beidh ar dhaoine a fhaigheann cabhair inaisíoctha Gníomhas Cúnaint agus nóta gealltanais a fheidhmiú leis an mBord sula dtabharfar amach an chabhair inaisíoctha.
6. Tá sé socraithe freisin go n-úsáidfidh an Bord gach aisíocaíocht a fhaightear tríd an Scéim Cabhrach Inaisíoctha go hiomlán ar mhaoiniú dul chun cinn breise sa chabhair inaisíoctha sa todhchaí.

Conas iarratas a dhéanamh ar chabhair airgeadais?
Chun iarratas airgeadais a dhéanamh, teastaíonn foirm iarratais comhlánaithe agus plean gnó (plean féidearthachta) agus doiciméadú tacaíochta. Caithfidh teilgintí airgeadais a bheith áirithe san bPlean Gnó (sreabhadh airgid dhá bhliana ar a laghad, cuntais trádála agus brabúis agus caillteanais). Beidh ráitis airgeadais staire riachtanach i gcás gnólachtaí reatha. Teastóidh 3 luachan agus fianaise ar chead pleanála i gcás tionscnamh tógála.

Moltar d’iarrthóirí cruinniú a shocrú le ball d’fhoireann an Bhoird sula seolann siad an t-iarratas ar aghaidh le treoir a fháil faoin gcaoi leis na foirmeacha riachtanacha a chomhlánú rle.

Deontas Staidéar Féidearthachta (€5,100 uasmhéid)

Tá deontais staidéar féidearthachta le fáil faoi láthair ón mBord do thionscnaimh incháilithe ag ráta 50% nó €5,100, cibé cé acu is lú, chun inmharthanacht tráchtála na dtionscnamh beartaithe, na dtáirgí nó na seirbhísí a mheas. Áirítear costais ar nós táillí comhairleoirí do thaighde margaíochta, forbairt fréamhshamhla, meastóireacht airgeadais sna caiteachais inghlactha. Tá áis ar fáil freisin a chúitóidh Tionscnóirí dá n-am féin ag ráta €10.00 san uair, 50 cent an míle do thaisteal agus ráta €50.00 sa ló do chothú. Níl taisteal thar lear clúdaithe.

D’fhéadfadh tionscnaimh i reigiún An Teorainn, Lár Tíre agus an Réigiún Thiar (BMW) cáiliú do 60% den chostas staidéar féidearthachta suas go dtí uasmhéid €6,350 agus d’fhéadfaí 50% den chostas staidéar féidearthachta suas go dtí €5,100 a fháil i dTiobraid Árann Thuaidh, i réigiún an Deiscirt agus an Oirthir. Ní thugtar amach deontais fostaíochta i bhfoirm inaisíoctha.

Na Critéir i leith Cabhrach:
Ghlac Bord Fiontar Thiobraid Árann Thuaidh leis na coinníollacha/athruithe seo a leanas sa bhreis ar na cinn a bhí acu cheana a bhaineann le haisbhreathnú, easpa foinsí eile tacaíochta, gnóthaí cánach, caiteachas deimhnithe rle chun deacrachtaí neamhriachtanacha i bpróiseáil na n-éileamh ar dheontais staidéar féidearthachta agus mí-úsáid na scéime a sheachaint:

(1) Caithfidh an Bord a bheith sásta gur dhéan na hiarrthóirí méid áirid taighde deisce nó eile roimh iarratas cabhrach a dhéanamh a thabharfadh le fios go bhfuil margadh féideartha ann don táirge nó seirbhís. Ba chóir achoimre a dhéanamh ar aon eolas atá bailithe go dtí seo agus é a sheoladh leis an iarratas.
(2) Go ginearálta, is iad na táillí comhairleora amháin a nglacfar leo sa chaiteachas inghlactha agus caithfear a bheith ionraic fúthu agus iad a dheimhniú chuig sástacht an Bhoird. D’fhéadfaí táillí inniúchóra/cuntasóra, taighde margaíochta, forbairt fréamhshamhla nó seirbhísí comhairleora maoine intleachta a áireamh iontu seo. Seol ar aghaidh táillí an phlean/luachana le d’iarratas.
(3) Ní ghlacfar ach le caiteachas airgid a bhí riachtanach agus a caitheadh ina iomláine mar chuid den staidéir féin ó thaobh ama an duine, taisteal agus cothú agus a cuireadh ar ais do chríocha cánach agus is 20% de chostais iomlán an staidéir an méid is mó a thabharfar. Caithfear aontú agus glacadh le caiteachas mar seo roimh ré.
(4) Ar chríochnú an staidéir, caithfidh an deontaí tuairisc scríofa a sheoladh ar aghaidh, atá inghlactha do Bhord Fiontar Thiobraid Árann Thuaidh, a leiríonn an taighde a déanadh agus na torthaí a bhí air.

Íocaíocht an Deontais

• Déantar íocaíocht bunaithe ar na sonraisc agus admhálacha a cuireadh isteach (gan C.B.L.).

• Caithfidh an caiteachas a bheith de réir an iarratais mar a cheadaigh an Bord.

• Caithfear Tuairisc Staidéir Féidearthachta sásúil a sheoladh chuig an mBord roimh tharraingt an deontais.

• Caithfear na deontais a tharraingt anuas taobh istigh de sé mhí ó ceadaíodh iad.

• Caithfear cloí le haon choinníollacha ar leith eile de chuid an Bhoird roimh íocaíocht an deontais.

NÓTA:

1. Má tá deontas staidéir féidearthachta ceadaithe, ní chiallaíonn sin go bhfuil ar Bhord Fiontar Thiobraid Árann Thuaidh cabhair deontais infheistíochta caipitil a thabhairt, a d’fhéadfadh tarlú mar gheall ar an taighde/staidéar a déanadh.

2. Ar chríochnú an staidéir, seolfaidh an tionscnóir tuairisc faoi thorthaí an staidéir chuig an mBord i bhfoirm atá sásúil dóibh. Tá an tuairisc seo rúnda agus ní thabharfaidh an Bord aon eolas as do aon tríú páirtí gan cead scríofa ón Deontaí.

Scéim Síol Chaipitil
Is féidir le duine a infheistíonn nó a thosaíonn ag obair i gcuideachta nua aisíocaíocht cánach, a bhíonn íoctha thar tréimhse 5 bliana, a fháil tríd an Scéim Síol Chaipitil a fheidhmíonn na Coimisinéirí Ioncaim (www.revenue.ie), faoi réir teorainneacha ar leith. Caithfidh an chuideachta a bheith páirteach i ngníomhaíochtaí incháilithe ar nós déantúsaíocht, seirbhísí trádála idirnáisiúnta, fiontair turasóireachta ar leith, taighde agus forbairt rle. Caithfidh an ghníomhaíocht a bheith deimhnithe ag gníomhaireacht cuí ag dearbhú gur togra nua bone fida é agus leathnaíodh an próiséas deimhniúcháin faoin Acht Airgeadais 1997 chun Boird Fiontair Contae a áireamh.
Beidh suim ar leith ag fostaithe, daoine dífhostaithe agus daoine a chaill a bpostanna, a raibh cáin ioncaim íoctha acu sna cúig bliana roimhe sin, agus iad ag smaoiniú a gnó féin a thosaí nó infheistíocht a dhéanamh i gcuideachta nua sa scéim.

Rúndacht
Beidh aon chomhráití idir Bord Fiontar Thiobraid Árann Thuaidh agus gnólachtaí/daoine aonair a bhíonn ag lorg cabhrach go hiomlán faoi rún.

^^ back to top of page ^^